Partia Socialiste kërkon që Reforma Zgjedhore të fillojë me një akt politik të nivelit të lartë. Shumica kërkon një tryezë politike, ku të marrin pjesë kryetarët e partive kryesore parlamentare në vend.

“Dua të shpreh dëshirën tonë për të institucionalizuar një tryezë politike të një niveli të lartë, e cila të adresojë të gjitha çështjet që na bashkojnë, por edhe ato që sot na ndajnë, por që duhet të na bashkojnë në interes të integrimit europian të Shqipërisë. Kjo tryezë duhet të përmbajë partitë më të rëndësishme politike të vendit dhe sigurisht që përfaqësimi i tyre të jetë në nivelin më të lartë, me kryetarin e partisë. Në këtë tryezë ne të fillojmë të identifikojmë pikë së pari gjërat që na bashkojnë, por duhet ta themi që Partia Socialiste nuk mund të jetë shtojcë funksionale e axhendës së Partisë Demokratike. Nuk mund të ulesh në një tryezë për të bashkëpunuar me kushte. Është në interesin e Shqipërisë, të integrimit europian të vendit, që ne të institucionalizojmë tryezën e dialogut politik konstruktiv”, deklaroi Taulant Balla, kreu i grupit parlamentar të PS-së. /TopChannel/